تــــــــــــاج

وصلني هذا التاج من أختنا في الله صاحبة مدونة أجمل أيامنا وبالرغم إني مش بقعد في البيت كتير علشان الإعتكاف بس حجاوب عليه بسرعة وربنا يستر
1- الحالة الجسمانية بمعنى هل سيادتك تتمتع بصحة جيدة ولا الاخ صاحب مرض ؟
والله الحمد لله أنا بنسبة كبيرة صحتي كويسة هو نظري ضعيف وبلبس نظارة وغالباً إن شاء الله ماليش جيش وبيجيلي برد كتير تقريباً مناعتي ضعيفة شوية بالرغم إني باكل كويس جداً بس تقريباً مافيش حاجة تانية
2-الحاله الاجتماعية بمعنى هل علاقتك بمن حولك جيدة ولا عامل مشاكل مع طوب الارض ؟
لا الحمد لله علاقتي بالنس كويسة مش حاقول ممتازة لكن لحد ما معقولة لكن لو في شخص حبيته وارتحتله بعرف أوصله واعبرله عن حبي له بطرق كتيرة يعني تقريباً بعرف أوصل مشاعري للي قدامي بأكثر من أسلوب حسب اللي يناسبه
بس يمكن في مشكلة إن في بعض الأشخاص اللي مش بستريحلهم والظروف كمان تحطهم في سكتي تعاملي معاهم بيبقى صعب جداً وممكن أطقش فيهم وتحصل بينا مشاكل بس بقالي فترة بحاول أحل المشكلة دي وأهدى على اللي قدامي .
3-الحاله العقلية بمعنى هل تشعر ان عقلك يعمل ولا حضرتك منيم دماغك ؟
والله بأمانة في حاجات وحاجات أنا أصلي مودي شوية لكن لما ببقى حابب حاجة بانشغل فيها قوي وبفضل الله بحقق فيها لكن لو مش حابب الحاجة ومافيش حافز إني أشغل دماغي فيها بصراحة بنيم دماغي ومابهتمش يعني أنا بصراحة مريح دماغي في كليتي (التجارة) على الآخر لأني مش حاببها أوي
لكن دا مايمنعش إني مشغول بحاجات تانية مهمة جداً ومشغل فيها دماغي وربنا يلهمنا الخير دائماً آمين
4-الحاله العاطفية مش محتاجة تفسير ومش عايز استعباط ؟
على فكرة أنا شخصية عاطفية جداً دا مش رايي أنا بس لكن دا تحليل كتير من اللي يعرفوني عن قرب
لكن أنا لسة طالب ولسة كمان سني صغير فعاطفيتي دي بوجهها في حاجات كتير أوي يعني أنا بحب ربنا أوي وبحب الدعوة إليه وبحب الرسول -ص- وبحب أصحابي وإخواني في الله اللي حبهم هو اللي حيدخلني الجنة ويظلني تحت عرش ربنا إن شاء الله
والكلام دا بجد مش علشان على المدونة ودا مايمنعش إن لازم يكون في حب لإنسانة تكون هي نصي التاني لكن لسة ماحصلش ومش دلوقتي خالص
5-الحاله الروحية بمعنى هل علاقتك بربنا كويسة ولا الكلام على ابو لهب ؟
والله دي حاجة لا يعلمها إلا الله أنا ماعرفش لكن كل اللي أعرفه إني بحب ربنا جداً ونفسي يغفرلي ذنوبي ويتوب علي ويدخلني الجنة

ــــــــــــــــــــــــــــــــــــــــــــــــــــــــــــــــ

الخمس اسئلة اللى جاية دى اسئلة متنوعة

الاول : اكتر عيب فيك ونفسك تتخلص منه ؟

ساعات مش بوفي بكلمتي عايز أي حاجة أتفق عليها أو أنويها أكون راجل فيه وأنفذها

الثانى : ايه الحاجة اللى عملتها وندمت انك عملتها قوى ؟

والله حاجات كتيرة بس في حاجة بالذات كل مابفتكرها ببقى ندمان أوي إني عملتها ومعلش أحب أحتفظ بيها لنفسي

الثالث : اية الحاجة اللى لسة معملتهاش وحتموت وتعملها ؟

- أنا حاسس إنكم حاتزهقوا مني في الموضوع دا أصلي اتكلمت فيه كذا مرة بس الحاجة اللي لسة ماعملتهاش وحموت واعملها -زي ما هو في صيغة السؤال- هي أني أدرس في الفنون الجميلة بجد

دي أمنية كبيرة عندي ويا ريت تدعولي بيها

- وطبعاً نفسي جداً أتم حفظ القرآن وأعمل عمرة

- نفسي جداً أصلي في المسجد الأقصى ربنا يعيد للمسلمين ويحرر لنا كل أراضينا

- أكيد باردو نفسي في إنسانة أرتبط بيها تكون ملتزمة وتعيني دائما على طاعة الله ونعيش حياة سعيدة مع بعض

- نفسي ربنا يفتح علي في الدعوة إليه ويرزقني الإخلاص

الرابع : اكتر دعاء بتقوله وبتردده دائما؟

والله مش ثابت على حسب حالتي في الوقت اللي بادعي فيه

الخامس : لو عرفت انك هتموت دلوقتى وقالولك اخر حاجة نفسك فيها ايه ؟

لو كنت زعلت حد أو جيت على حق حد أصالحه وأرد له حقه

وأحب أمرر التاج دا لأصحاب مدونات نيران دمعة ودعوتنا وست البنات يا رب تحلوه المرة دي وطبعاً أختنا آلاء وأخونا إسلام صاحب القلم الجريح وكل اللي حايدخل ويعلق على التاج

وجزاكم الله خيراً

الإعتكاف

عن السيدة عائشة رضي الله عنها أن رسول الله -ص- كان إذا دخل العشر الأواخر أحيا ليله وأيقظ أهله وشد المئزر

1-شد المئزر أي هيأ نفسه وأتم الإستعداد

2-أحيا ليله أي الأعمال التي يتعبد بها لله في هذه الأيام من ذكر وتفكر وقيام والخ

3-وأيقظ أهله أي دعى غيره لكي ينال من الثواب الكثير

ثلاث معاني خرجت بها من هذا الحديث عن الإعتكاف

نسأل الله عز و جل أن يبلغنا ليلة القدر ويجعلنا من المعتوقين

ملحوظة

في موضوع رائع عن الإعتكاف في مدونة دعوتنا اللي في المفضلة بتاعتي

معلش....... المرة دي إوجع قلبك....في رمضان الآخر

أولاً كل سنة وأنتم طيبين ورمضان كريم ربنا يكرمنا فيه ويجعلنا من الفائزين المعتوقين من النار اللهم آمين

ثانيا آسف جدا لأني بقالي فترة لم أدون ولم أزور المدونات الصديقة أيضاً لكن عذرا لأني كنت مشغول جداً

وكنت أتمنى إني أنزل بوستات تانية عن رمضان قبل البوست دا لكن الوقت لم يسعفني

المهم إن أنا خلال شهر رمضان حدون خواطر يعني المعاني اللي أنا حاسس بها واللي ممكن نستفيد منها

وأول معنى جال بخاطري في رمضان هو معنى رمضان الآخر

عندما يقترب شهر رمضان ونجد أنفسنا في أول ليلة من لياليه نبدأ نسأل هو احنا حنفطر أول يوم فين ؟

وحنعزم قريبنا الفلاني إمتى ؟

وحنفطر مع طنط فلانة إمتى ؟

ودا معنى كويس من معاني رمضان وهو صلة الرحم وزيادة الترابط الأسري والعائلي

لكني وسط هذه الأسئلة تذكرتها وأخذت أتخيل كيف سيمر عليها رمضان وكيف سيكون أول إفطار لها بدونه

وأنا أعلم كم تحبه فلقد رأيتها وهي تناديه ودموعها تسيل من عينها وتقول له

أبتاه طالت غربتي من طول ليل الرحلة

يا كأس حبي يا أبي عد للصغيرة بلهفة

عد يا أبي أنا لا أنام فأنت أنت وسادتي

عد يا أبي واحمل إلي كما وعدت هديتي

عد يا أبي فبدونك الدنيا قذى في مقلتي

مزقت أيام الغياب لكي تعود بسرعة

وتضمني في حضنك الدافئ فتذهب غربتي

وأرى الحياة على ذراعك يا أبي كالبسمة

عد وأروي لي قصص البطولة كي تشب بطولتي

عد يا أبي فالكل يسأل عنك حتى جارتي

عد سيكون في استقبال طيفك فرحتي

إنها الطفلة الصغيرة عائشة ابنة المناضل الإخواني المعتقل حسن مالك

يمر على هذه الطفلة وكل أسرتها وكل أبناء المعتقلين- بدون أي ذنب إلا أن يقولوا ربنا الله- رمضان وهم يتألمون لفراق الأحبة فمنهم من فقد الأب والأخ و الزوج

نعم فقدوهم مع أنهم أحياء خلف أسوار المعتقلات

موقف دعاني لأكتب لكم أن تتذكروا أن هناك من يضحي من أجل ربه والثمن ترك بيته وأهله وولده وضياع ماله فلا تنسوهم في دعائكم في رمضان

وأترككم مع بعض الصور لأبناء المعتقلين تصرخ فيكم أغيثونا لعلهم يجدون من بينكم من يلبي ويستجيب فيبرئ ذمته أمام الله